〈㧎著一枝風機仔〉
阮佇立棑仔頭
看顧𨑨迌的海豬仔
徛泅青色海湧
迵過風機仔的柱仔邊
找毋迴流彼條路
按怎都摸無的生份
燥音軁入耳空
季風吹過面模仔
嚨喉內㧎著一枝風機仔
喙空流出死鹹氣味
掩崁悲傷的血水
仰是姑不而將的紅珠淚
予阮無步佮伊來做伴
遐大龐的風機仔
無情幌頭的風吹輪仔
機械仔聲捲去囡仔的歌
看袂過冬鳥的烏影
今仔日仝款無緣來相見
伊底時欲轉去阮鄉里
渡袂得過的烏水溝
彼个風機仔袂講得媠
啥人會堪得這款買賣
按怎算都袂和的性命
海豬仔，真無捨施
海漲替伊彈琴閣伴奏
船仔哭出乞食調
阮那挨二絃那唸歌
有請天公來主意
佗位才是安身的所在
向望幾日仔的快活
〈㧎著一枝風機仔〉著於2023/11/14
