〈田水摻電金－感慨工業廢水穢涗田地的案件〉 五花十色的廢水 恁講是經濟的命脈 加添一枝暗管 就恬恬，流向圳溝內 稻仔恬恬啉田溝水 毋知影水內覕含毒素 漸漸侵蝕伊的清 加戮一個暗空 就恬恬，灌到涵溝內 青菜恬恬啉鼓井水 佮徛黃來跋時機 青翠的葉仔浮現烏斑 四跤仔的目睭湠開目屎 拚性命，咬著喙脣 講好矣，袂使哭 拍拚愛活落去 稀微的土地 花謝，嘛落塗 無子閣無女 連半个人影嘛無佮伊做伴 姑不將，弔祭閣封棺 幌著有體無魂的幡仔 揀一个好日子，通落葬 掠做看無，無代無誌 仝款烏白流轉 〈田水摻電金－感慨工業廢水穢涗田地的案件〉著於2023/08/08，2023/12/13酌修字詞 入選《台客詩刊》35期
